آخر خبر مات الكلام والشعر تاهت خطوته
زي الحصان لما انجلد والجَلد ياكل قوته
وفـ برد ليل الظالمين القهر ينحل جلدته
زي الفقير لما الهموم قامت تفرتك جتته
مات الضمير من غير ضمير عاشق بينسى محبته
و فـ خط سير ماشي عليه رافض يعدِّل سكِّتُه
خايف يقول الآه فـ يوم للنار دي تحرق فرشته
خايف يقول الآه فـ يوم للسجن يصبح سُكنته
سايب حبيبته لويل وليل وماكنش يقصد كسرته
لاكِنّ فقر الحال وجيعة لكل شاب وأسرته
***
مات الكلام من غير كلام وسكوتنا أصبح رسمته
عيشة الحلال صارت محال والكل عاوز شهوته
كل اللي قال هيصة ومال عايزيحقق شهرته
كل اللي راد يحصل مراد بايع لدينه ودنيته
وان عاش شريف في الكون عفيف أحزانه تاكل كبدته
وعجوز قديم فكره السليم مشتاق بجد لآخرته
عيل بـِطِين بيسب دين والسب أصبح لهجته
راجل طويل زي النخيل بحرام يحقق رغبته
مع ست نغشة مدندشة فيها النظر جاب متعته
واهو راح معاها كما البغال شايل في جيبة فياجرِته
وِأَبو الرجال زي العيال طالع بيبكي فـ وكسته
فك اللجام في طريق حرام غمس فضيحته بسمعته
****
مات الكلام لما الكلام يعجز يحقق فايدته
تلميذ دروس واخد فلوس علشان يحلي مقابلته
جوه الكافيه على شيشة إيه راجل بيعزم شلته
بفلوس ابوه رايح يتوه بحشيشة تظبط أعدته
وبنات جميلة شعورها ليلة جيوبها عازت صحبته
ومدرسين زي الجراد الكـُل كـَل من مادته
عايز فلوس علشان يدوس الكل دوسة بجزمته
أصبح مهم انه يلم من غير ما يدِّي تلامذته
وتوقعات فيها الشتات وقديمة تصبح وصفتة
طالب همام أبداً ما نام كان كل فكره مذاكرته
رايد يحقق حلم أهله , نضيفة كانت سكـِّته
واهو جاب كتير مجموع كبير زائد دموعه وحسرته
إيه العمل لما انقفل تنسيقه موِّت فرحته
لما المكاتب نسـَّقِت واتنسـَّقِت ونجاحه يشبه إلـِّتـُه
ده أملنا يشبه للألم لما الألم زاد من أنينه ووجعته
أعمالنا طالعة مهببة ومتنيلة وإلهنا نزل رحمته
آخر الكلام مات الكلام لما الخلايق نسيته
آخر الكلام مات الكلام والشعر تاهت خطوته
